Батыс Қазақстан облысының ономастикалық комиссиясы жылдың соңына дейін 59 елді-мекен және 184 көшенің атын өзгертпекші. Алайда олар халық рұқсат берсе ғана бұл мүмкін екенін мәлімдеп отыр. Ал бұл ұсынысқа бас көтерушілер табылып жатыр.
Батыс Қазақстан облысы Тілдерді дамыту басқармасы жетекшісінің міндетін атқарушы Гүлжан Әлжанова жыл соңына дейін өңірдегі елді-мекендер мен көшелердің атаулары өзгеретінін растады. Оның айтуынша, жергілікті әкімдікте жиналыс өтеді, оған ел халқы жиналып, дауыс береді, соған сәйкес шешім шығарылады. Міне, тура осы жолмен келесі жылы Орал қаласындағы атаулар қолға алынбақ.
Ол үшін мына сілтеме арқылы өтіп, қолдайтын пікірді айтқан адамның суретін бассаңыз болғаны.
Ал елді-мекен атауын қазақшалау туралы бастамаға қатысты оралдық қауымның қарама-қайшы пікірлері былайша болып келеді.
Геннадий Мухин, „Ескі Орал„ мұражайының директоры:
– Мен қарсымын. Өйтсек тарих өзгереді. Мысалы, Коловертное ауылы Оралдан да үлкен, оған шамамен 300 жыл. Бір уақытта, ол жоқ болып кетеді. Әрине, бұл ауылдарда орыстар тұрғаны, қазір оған қазақтар көшіп келіп жатқаны түсінікті. Тіпті, қазақша атау беруді жақтайтындар басым болады. Өйткені ондағы тұрғындардың басым бөлігі қазақтар ғой. Меніңше, бұл азаматтың құқығын бұзу және тарихты бұрмалау. Мүмкін біз атауды өзгертуге қарсы қол жинайтын шығармыз. Әзірге, ойланып отырмыз.
Жантас Сафуллин, қалалық мәслихаттың депутаты:
– Біз бүтіндей елді-мекен мен көше атауларын қазақшалап тастайық деп жатқанымыз жоқ. Ішінде мән-мағынасы жоқ атаулары бары белгілі. Тіпті, бір атауда бірнеше көше де бар. Адам шатасады. Сол секілді патша заманынан келе жатқан атаулар бар. Әрине, бұл іс жергілікті халықтың келісімімен жүзеге асырылады. Сондықтан жергілікті тұрғындар осы істің маңыздылығын түсінсе деймін. Біз ұлтараздық мәселесін қоздыруға қарсымыз. Сондықтан мен депутат ретінде қолға алынбақ бұл шара туралы елді-мекендерге барып, түсіндіріме жұмысын жүргізуге дайынмын. Бірақ менің пікірім – атауларды өзгерткен дұрыс.