Алеппо қаласын әуеден бомбалаудан аман қалған баланың суреті баспасөз бен әлеуметтік желілерге тез тарап кетті. Ол Сириядағы соғыстың бейнесіне айналды.
Осы суретті түсірген журналист әуе соққысынан сегіз адам өлгенін, олардың бесеуі – бала екенін хабарлады. Сириялық адам құқығының сақталуын бақылаушы орталықтың мәлімдеуінше, соққыны президент Башар Асад әскерінің ұшақтары жасаған.
Сириядағы азаптаулар есебін тіркеу орталығының хабарлауынша, азаматтық соғыс елде 14 мыңнан астам кәмелет жасқа толмаған адамның өмірін қиды. Сириялық жанжал басталғалы бері елде 280 мыңнан астам адам өлді.