Биылғы „Алтын тұлпар„ аламан бәйгесі Тәуелсіздіктің 25 жылдығына арналады
Қазақстан Республикасы Тәуелсіздігінің 25 жылдығына арналған аламан бәйгеден «Алтын тұлпар» дәстүрлі республикалық турнирі өтеді.
Бәйгенің бас серіктесі – «Самұрық-Қазына» ұлттық әл-ауқта қоры, «Samruk-Kazyna Trust» әлеуметтік жобаларды дамыту қоры, «Нұр Отан» партиясы, ҚР Мәдениет және спорт министрлігі, ҚР Ұлттық спорт түрлері қауымдастығы.
Аламан бәйгенің жарыс жолы 51 шақырымды құрайды. Бәйге үлкен аумақты шеңберді 4 рет айналып шабу арқылы жүргізіледі. Жарыс жолының бойына әрбір 2 шақырым сайын барлығы – 7 бақылау бекеті орналасады. Бекеттерде телекамералар мен төрешілер, мал дәрігерлері, тәртіп сақшылары тұрып, бәйге барысын бақылайды.
Аламан жарысқа еліміздің 14 облысы және Астана, Алматы қалаларының әрқайсысынан 10 сәйгүліктен қатысады. Жарысқа жүйрік тұқымдардың барлығы қатыстырылады. Мәреге алғашқы жеткен 9 тұлпарға диплом және қаржылай жүлде беріледі.
Аталмыш шара аясында «Ат сыншысы» байқауы ұйымдастырылады. Шын жүйрікті жазбай таныған сыншыларға «Толыбай сыншы», «Күреңбай сыншы», «Шоқай сыншы» және «Киікбай сыншы» атындағы арнайы жүлделер бар.
Жарыс өтетін жерге жолаушылар тасымалдайтын автобус қатынайды. Жарыс кезінде концерттік бағдарлама, қолөнер көрмелері және тойшыл қауымға арнап қымызмұрындық, ұлтық тағам түрлерінен фестиваль ұйымдастырылады.
Былтыр қыркүйек айында Ақмола облысы, Целиноград ауданы, Қабанбай ауылында өткен „Алтын тұлпар„ республикалық аламан бәйгесі Қазақ хандығының 550 жылдығы мерейтойына арналған болатын. Ол кезде бас жүлдені Жамбыл облысының шабандозы Ақжол Жұматай еншілеп, 10 миллион теңгені „қанжығасына байлаған„ еді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе