Қазақстанның Қорғаныс және аэроғарыш өнеркәсібі министрі тағайындалды.
Бұл туралы Ақорданың Twitter-дегі жеке парақшасында хабарланды.
Атамқұлов бұған дейін Оңтүстік Қазақстан облысының әкімінің қызметін атқарған болатын. Сонымен қатар Инвестициялар және даму министрлігінің жауапты хатшысы лауазымында болған.
Атамқұлов Бейбіт Бәкірұлы 1964 жылы 19 мамырда Алматы облысында дүниеге келді.
1986 жылы Ленин атындағы Қазақ политехникалық институтын инженер-металлург мамандығы бойынша аяқтады. 2000 жылы Санкт-Петербор экономика және қаржы мемлекеттік университетін тәмамдады, экономика ғылымдарының кандидаты.
1991 жылдан бастап 2006 жыл бойынша жеке секторда – өнеркәсіп кәсіпорындарында жұмыс атқарды. 2006 жылдан бастап – кеңесші, Ресейдегі Қазақстан елшісінің елші-кеңесшісі. 2007 жылдан бастап – Ирандағы Қазақстан елшісінің елші-кеңесшісі.
2008 жылдан бастап – Майндағы Франкфурт қаласындағы Қазақстанның бас консулы. 2010 жылдан бастап – Малайзия, Индонезия Республикасы, Бруней-Даруссалам, Филиппин республикасында Қазақстанның төтенше және өкілетті елшісі. 2012 жылдан бастап – Индустрия және жаңа технологиялар министрлігінің жауапты хатшысы. 2014 жылдан бастап – Инвестициялар және даму министрлігінің жауапты хатшысы. 2015 жылы 8 тамызда Оңтүстік Қазақстан облысының әкімі болып тағайындалған.
Айта кетсек, бұған дейін елімізде Қорғаныс және аэроғарыш өнеркәсібі министрлігі құрылғаны хабарланған еді.
Министрлік қызметінің негізгі бағыттары – қорғаныс, аэроғарыш өнеркәсібі және электрондық өнеркәсіп, ақпараттандыру және байланыс саласындағы ақпараттық қауіпсіздік (киберқауіпсіздік), бірыңғай әскери-техникалық саясатты және әскери-техникалық ынтымақтастықты жүргізуге қатысу, қорғаныстық тапсырысты қалыптастыру, орналастыру және орындау саласындағы басшылық болмақ.