Банк алдында борышкер 40 мыңға жуық отбасы жалғыз баспанасынан қуылмайтын болды

55 просмотров

Бұдан былай банк борышкерлері кепілге қойылған үйлерінен қуылмайды. Банк өзіне қарыз адамдармен мәмілеге келе бастады.

Бұл туралы ҚР Ұлттық банктің баспасөз қызметі хабарлады.

Осыған дейін үйлерін кепілге қойған азаматтарды жалғыз баспанасы болса да үйінен күштеп шығарылып келген. Осыны тоқтату үшін Ұлттық банк, екінші деңгейлі банктер мен Алматы әкімдігі, қоғамдық бірлестіктер болып төрт жақты мәмілеге қол қойылды.

Мәмілеге сәйкес, енді 3 ай мерзім ішінде несиесін қайтара алмай жүргендер банкке келіп, басындағы жағдайымен бөлісуі тиіс. Алайда, бұл борышкер несиесін төлемейді деген сөз емес. Тек шамасына қарай төлеу шарттары жұмсартылады.

Қазіргі таңда елімізде әне-міне үйінен қуылуға шақ отырған 40 мыңға жуық отбасы бар. Ал төрт жақты қол қойылған құжат осы түйткілді шешуге септігін тигізеді.

— Борышкер өз еркімен банкке келіп, қаржылық қиындықтары барын ашық айтуы тиіс. Осылай бола тұра, қарызын өтеуден бас тартпайтындығын білдірсе, банк өкілдері оған түсіністікпен қарап, әр борышкерге қарызды өтеудің жолдарын бірлесіп қарастыратын болады — деп түсіндірді Ұлттық банктің басқарма басшысы Александр Терентьев.

Загрузка...