БҰҰ Қауіпсіздік кеңесі құрамында Қырым автономиясы кіретін Украинаның аумақтық тұтастығына қатысты ұстанымын сөзсіз қуаттады. Бұл туралы Украинаның БҰҰ-дағы тұрақты өкілі Владимир Ельченко мәлімдеді, деп хабарлайды «112 Украина». Оның айтуынша, мұндай ұстанымды Ресей Федерациясы ғана қолдамаған.
«Украинаны Қырымға қарсы теракт жасауға талпынды деп айыптаған олар неге дәлелді алға тартпайды? Оны дәлелдейтін суреттер немесе видеолар қайда? Бос сөзбен айыптайды”, – деді Ельченко. Бұның алдында БҰҰ Қауіпсіздік кеңесі Қырымдағы жағдайдың ушығуына байланысты жабық жиналыс өткізді. Отырыс Украинаның өтінішімен шақырылды.
Ресей және Украина арасы Федералдық қауіпсіздік қызметінің Қырымда “диверсанттарды” ұстауына қатысты хабарынан соң күрт суып кетті. Ұсталғандар украиналық барлау қызметкерлері делінеді. Оларды ұстау кезінде екі ресейлік офицер қаза тапты деп хабарланды.
Президент Владимир Путин Украина билігін террорды қолдануға көшті деп айыптап, Донбастағы жанжалды бейбіт реттеу жөніндегі “нормандиялық форматтағы” кездесуден тас тартты.