Бүгін футболдан Еуропа чемпионаты басталады

42 просмотров

 Футболдан Еуропа чемпионатының Марсельдегі беташар матчта Франция мен Румыния кездеседі.

Еуропа чемпионаты биыл 15-ші рет ұйымдастырылып отыр. Турнирдің ең алғашқы чемпионы – КСРО құрамасы болса, қазіргі чемпион (2012 жыл) – Испания құрамасы. Сондай-ақ, Испания мен Германия құрамалары турнирде ең көп чемпион атанған командалар. Екі құрама тұғырдың ең биік сатысына үш реттен көтерілген.

Биылғы чемпионаттың бір ерекшілігі бұрынғыдай 16 құрама емес 24 команда қатысады. Оның ішінде Исландия, Солтүстік Ирландия, Уэльс, Албания және Словакия құрамалары Еуропа чемпионатына тұңғыш рет қатыспақ.

Биылғы Еуропа біріншілігінде 18 төреші қазылық етеді. Олардың арасында Виктор Кашшаи, Юнас Эрикссон, Джюнейт Чакыр және Мартин Аткинсон сияқты Еуропаның ғана емес, әлемнің үздік төрешілері бар. Чемпионаттың ашылу ойынын, яғни, Франция – Румыния матчын венгриялық төрешілер бригадасы басқарады. Ойынның бас төрешісі – Виктор Кашшаи.

«Қазақстан» Ұлттық телеарнасы турнирдегі 51 кездесудің 36-сын, ал, «Kazsport» телеарнасы 15 матчты тікелей эфирде көрсететінін айта кетелік. Сонымен қатар, матчтардың қайталауын «Kazsport» телеарнасынан көре аласыздар.

Ал, 11-маусымнан бастап кешкі сағат 18:50-дегі ойынды «Kazsport» телеарнасы, ал, «Қазақстан» Ұлттық телеарнасы сағат 21:50 мен 00:50-де басталатын ойындарды тікелей эфирде көрсетеді.

Загрузка...