„ҚазАгро„ холдингі аграрлық инвестициялар қорын құрғалы жатыр

24 просмотров

Қазiргi уақытта ресурстар жетпей жатқан агроөнеркәсiп кешенi жобаларын жүзеге асыру үшiн «ҚазАгро»холдингi FPP Asset Management LLP компаниясымен бiрлесiп, аграрлық инвестициялар қорын құрады.

Бұл туралы бүгiн баспасөз мәслихатында ұлттық холдингтiң басқарушы қаржы директоры Бану Ерғалиева жеткiздi деп хабарлайды BNews.kz.

— Жобаның бастапқы капиталы 50 млн доллар деңгейiнде болса, кейiн ол 300 млн долларға дейiн жеткiзiледi. Жаңа қор толығымен «ҚазАгро» есебiнен құрылады. Қор жұмысын бастағаннан кейін екi-үш жылдан кейiн инвесторларды тарту жоспарланып отыр, — дедi Бану Ерғалиева.

Тiкелей инвестициялар қоры биылғы жылдың соңына дейiн құрылады. Қордың басқарушы компаниясы — FPP Asset Management LLP. Бұл компанияның тікелей инвестициялар қорын басқарудағы тәжірибесі мол.

— Қордың мақсаты – қазіргі уақытта ресурстар жетпей жатқан қолданыстағы агроөнеркәсіптік кешені жобаларын дамыту, сондай-ақ мал шаруашылығы, құс шаруашылығы, жеміс-көкөніс шаруашылығы, балық өсіру, сүт өндірісі, дәнді және май дақылдарының өндірісі мен ауылшаруашылық техникасын құрастыру сияқты бағыттар шеңберінде жаңа жобаларды қаржыландыру», — дедi ол.

Бұдан бөлек, қазiргi уақытта қанатқақты жоба – қазақстандық-венгриялық тiкелей инвестициялар қоры iске қосылған. Оның бастапқы капиталы 40 млн АҚШ доллары, бұл көрсеткiштi 150 млн АҚШ долларына жеткiзу көзделген.

Қордың басқарушы компаниясы – ADM Capital. Ол Қазақстанда ауыл шаруашылығының астық өндірісі және өңдеу, мал шаруашылығы, ауылшаруашылық өнімдерін қайта өңдеу сияқты секторларында 100-ден астам түрлі инвестициялық жобаны қарады.

Қазіргі уақытта 3 жоба мақұлданған. Олар — Ақмола облысындағы сүт-тауарлық ферма және минерал тыңайтқыштарын шығару зауыты, сондай-ақ Ақтөбе облысындағы жылыжай кешені.

Загрузка...