Діни экстремистер полиция қызметкерлеріне, сонымен қатар халық көп жиналатын орынға шабуылдауды жоспарлаған.
Бұл туралы ҚР Ұлттық қауіпсіздік комитетінің баспасөз қызметі хабарлады.
Ведомствоның баспасөз қызметі таратқан ақпаратқа сәйкес, 12- және 30-тамыз аралығында Ақтөбе және Батыс Қазақстан облыстары аумағында үш радикалды топтың іс-әрекеттеріне тосқауыл қойды.
„Нәтижесінде, радикалдардың құқық қорғау қызметкерлеріне шабуылдар жасау, сондай-ақ халық көп шоғырланатын орындарда терроризм актілерінің жасау жоспарларын іске асыру ниеттері бұзылып, орындылмады. Топ мүшелерінің тұрғылықты мекен-жайларын тінту барысында бірнеше атыс қаруы және оған қажетті оқ-дәрілер, тротил, қолдан жасалған жарылғыш зат, суық қару, экстремистік мазмұндағы баспа және аудио материалдар, халықаралық террористік ұйымдардың төлбелгілері алынды„ делінеді хабарламада.
Көрсетілген топ мүшелеріне қатысты ҚР Қылмыстық кодексінің 174-бабы, яғни «Әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыру», 256-бап, «Терроризмдi насихаттау немесе терроризм актiсiнжасауға жария түрде шақыру», 257-бап, «Террористік топ құру және оның қызметіне қатысу», 231-бап, «Жалған ақша немесе бағалы қағаздар жасау, сақтау, алып өту немесе өткізу», 287-бап, «Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру», 288-бап, «Қаруды заңсыз жасау» сынды заңбұзушылықтарға қатысты сотқа дейінгі тергеу шаралары жүргізіліп жатыр.
Сот санкциясына сәйкес, Батыс Қазақстан облысының 10 тұрғыны және Ақтөбе облысының 11 тұрғыны қамауға алынды.
Тергеу амалдары жүріп жатыр.