Қазақстандық ауыр атлеттердің допингке қатысты дауы әлі дәлелсіз күйде қалып отыр

203 просмотров

Біздің ауыр атлеттердің допинг қолданды деген кінәсі бұрынғыша дәлелсіз күйде қалып отыр.

Бұл туралы Қазақстан ауыр атлетика федерациясының баспасөз қызметі хабарлады.

Бұдан бұрын хабарланғандай, Халықаралық ауыр атлетика федерациясының басшысы Тамаш Аян Рио-де-Жанейродағы Олимпиада аяқталғаннан кейін Ресей, Қазақстан, Беларусь ауыр атлетика федерацияларының бір жылға жарысқа қатысу құқығынан айырылатынын мәлім еткен еді.

Осыған қатысты ҚР ауыр атлетика федерациясының бас хатшысы Омар Мұстафин өз пікірін білдірді.

— Бейжің мен Лондондағы допинг сынамаларды қайта тексеруден өткізгендегі қорытынды бойынша үш немесе одан көп дәлелді факт тіркелген елдерді жарысқа қатысу құқығынан айыру шешімі шығарылады. Осы жылғы маусымда өткен Халықаралық ауыр атлетика федерациясы Атқарушы комитетінің отырысы барысында мұндай шешім қабылданды. Алайда бұл шешім заңды күшіне енген жоқ.

Сондықтан заңды тұрғыдан алғанда жағдай бұрынғы қалпын сақтап тұр. Қайтадан тексеру болады деп күтіліп отыр. Осы кезеңге іліккен елдер мен спортшылар саны артуда. Бұл ретте бүгінде бұдан бұрын сынамалары оң нәтиже көрсетті деген біздің атлеттеріміздің кінәсі әлі дәлелденген жоқ, осыған орай жарыстан айыру құқығы ешкімге қолданылмайды. Біз жағдайды бақылауда ұстап отырмыз. Жұртшылыққа әр заңды қадамды БАҚ арқылы жеткізіп отырамыз, — деді ол.

Загрузка...