Астанада Қазақстанның сыртқы істер министрі Ерлан Ыдырысов Қазақстандағы Израиль елшісі Михаэль Бродскийді қабылдады, – деп хабарлады ҚР СыртқыІсМиннің баспасөз қызметі.
Кездесуде екіжақты ынтымақтастық, сонымен қатар саяси, экономикалық, әлеуметтік және өзге де салалардағы қатынастарды дамыту перспективалары талқыланды.
Екі ел арасындағы сауда-экономикалық серіктестіктің маңыздылығын атап өткен Ерлан Ыдырысов ауыл шаруашылығы саласында өзара тиімді ынтымақтастықты дамытуды ұсынды. Ведомство басшысы 2015 жылдың мамырында «Үшқоңыр» орталығының базасында құрылған тамшылап суару учаскесі аталған саладағы сәтті ынтымақтастықтың үлгісі екенін атап өтті.
Сыртқы саясат ведомствосының басшысы екі елдің азаматтарын визалардан босату туралы екі жақты келісімдер жасауға дайын екенін айтып, келісім сауда, инновациялар және туризм салаларындағы ынтымақтастықты дамытуға серпін беретініне сенімді.