Қазақша білмеген мекеменің масқарасы шықты

6 549 просмотров

Алматы жылу желісі мекемесі қала тұрғындарына қазақша былапыт сөз жазылған ескерту хатты жолдаған. Кейіннен хатқа „өзгеріс„ енгізген  хакерлер екені белгілі болды.

Бұл туралы «Алматы жылыту желілері» ЖШС-ның бұрынғы басшысы Дәурен Әлімбеков Facebook-тегі жеке парақшасында хабарланды.

Ол қалалықтарға жылу энергиясы үшін қарызы туралы келіп түскен хабарландырудың суретін жүктепті. Ескерту хаттың қазақша мәтінінде былапыт сөздер жазылған.

«Қазақша түсінбейтіндерге: неміс сантехниктері туралы фильмді көз алдарыңызға елестетіңіздер. Егер қарызды төлемесеңіз осындай қылайын деп тұр бұлар», — деп жазды Әлімбеков.

Оның айтуынша, мұндай хабарландырулар қала тұрғындарының тең жартысына келген.

Tengrinews.kz порталына берген түсініктемесінде «Алматы жылу желісі» ЖШС баспасөз хатшысы Наталья Инкина өз серверлеріне біреулердің бұзып кіргенін, бірақ ол арадағы қызметкерлер мұны білмей, осы құжаттың мәтіні дұрыс екен деп басып шығарғанын айтқан.

Демек, мекемеде қазақша білетін бір жан болмағаны ғой. Әйтпесе, бұл масқара құжаттың қаланың тең жартысына тарап кетуін қалай түсінуге болады?..

Қалай дегенмен де осылайша масқарасы шыққан Алматы жылу желісі өздерінің сайтында қала тұрғындарынан осы хабарландыру үшін кешірім сұрап, ағаттық жібергендерін мойындаған.

Загрузка...