Қазақтың өзіндік келіндер мектебі бар. Отбасын берік ұстап, бақытты өмір сүру қағидасы ежелден анадан қызға, енеден келінге мұра етіп беріліп келе жатыр.
Орыстану дәуірінде көп отбасы осы құндылықтан айырылып қалды. Заманның өзгеруі, орысқұл санадағы адамдардың пайда болуы тағы бар. Алайда отбасылық бақыттың құпиясы одан өзгеріп кеткен жоқ. Қазір талай қыз-келіншек интернет қопарып, оның сырын іздеп жатады. Әркімге өзінікі демекші, қазаққа да бақытты болудың кілтін ұлттық құндылықтардан асып, алыстан іздеудің қажеті жоқ.
Сондықтан бұл ретте қазақ келінінің жанұясындағы міндеттерін тізбелей кетелік:
1. Ерте тұрып от жағу, шай қойып, дастархан жаю, ата-енесіне сәлем салу.
2. Төсек-орнын жинап, үй ішін сыпырып, жуу.
3. Үй жиһазын, ыдыс-аяқты күтіп ұстау, тамақ істеу, кір жуу.
4. Баласының, күйеуінің киімін үтіктеп, оқуға, жұмысқа таза, ұқыпты киініп баруын қамтамасыз ету.
5. Отбасы қаржысын үнемдеп жұмсау, оны екінші жалақыға дейін жеткізе білу.
6. Тұрғын үй төлемдерінің уақытында төленуін бақылауға алу.
7. Ағайынның бір-бірімен араласуына, сыйластықта өмір сүруіне ықпал жасау.
8. Қонақжайлылық таныту.
9. Өзінің үсті-басын күтіп-ұстауы, отбасында ұрыс-керістің болмауына өзін де жауапты екенін сезінуі.
10. Үй ішінің ескі-құсқыдан құтылып, төсек-орын, киім-кешек, ыдыс-аяқтың, азық-түлік түрлерінің жаңарып, жақсаруына ұйытқы болу.
11. Үлкендер алдында жалаңбас жүрмей, орамал тартып жүруі.
12. Омырауын, балтырын, ішін жалаңаштап көрсететін киім-кешек кимей, әдепті болу, дауыс көтеріп сөйлемеу, қатты күлмеу.
13. Ата-енесінің, бала-шағасының, өзге адамдардың алдында күйеуімен ұрыспау, дөрекі мінез танытпау.
14. Үлкен адамдардың алдын кесіп өтпеу, олардың көзінше ыржалақтап күлмеу, әзілдесіп-қалжыңдаспау.
15. Үй жануарларын (малды, итті, мысықты) аяқпен теппеу, ұрмау.
16. Дастархан басында, ата-енесінің алдында арақ-шарап ішпеу, стақан, рюмке соғыстырмау, оны қолға да алмау.
17. Ата-енесінің төсегіне отырмау, оған жатпау.
18. Үй ішінде әбес бейне-фильмдерді көрмеу, музыка ырғағымен билемеу, дауыстап ән шырқамау.
19. Баласын емізгенде ешкімге омырауын көрсетпеу.
20. Жуылған іш киімдерін өзгелер көретін жерге іліп қоймау.
21. Ата-енесінің, күйеуінің келісімінсіз орынсыз қонақ шақырмау.
22. Жұрт көзінше әдепсіз қимылдар жасамау.
23. Үй ішін таза ұстау.
24. Өсек, өтірік айтпау, мақтанбау.
25. Отбасының береке-бірлігін, күйеуінің беделін ойлау, ата-анасының сағын сындырмау, төркіншіл болмау.