Атырауда бір айдан бері мал қырылып жатса да ресми органдардан үн жоқ

63 просмотров

Атырау облысы Құрманғазы ауданында арам қатқан ірі қараның саны күн өткен сайын артып барады. „Әуелі, ірі-қараның қызуы көтеріліп, денесіне бөртпе қаптап, аузы-мұрнынан су ағып, ақыр аяғында әбден азып өледі„ — дейді тұрғындар.

Бұл туралы КТК арнасы хабар таратты.

Тана-торпақтың мұндай белгілермен қырылып жатқанына біршама уақыт болса да жергілікті мал дәрігерлері нақты диагноз қоя алмай отыр. Ал Астана мен Алматыдан шақыртылған арнайы мамандар сынама алып кеткенімен, оның да нәтижесі әлі жоқ.

Ауданда 45 жыл бойы мал дәрігері болып қызмет еткен Уап Қалуовтың айтуынша, мүйізді ірі қараның бұлайша ауыруы – бірінші рет. Ақсақал бұл індет бізге сырттан келді дейді. Яғни, жазғытұрым Ресейден, нақтырақ айтқанда Дағыстаннан Атырауға еркек мал тасымалданады екен. Ал осындай ауру аз уақыт бұрын Шешенстан мен сол Дағыстанда тіркеліпті.

— Мына сиырға 12 күн болды тұрғанына. Ауру мал келді, оны ешкім зерттеп жатқан жоқ, кілең бір-бірін қошеметтеп отырған адамдар!, — дейді Құрманғазы ауданының тұрғыны Уап Қалуов.

Көкарна ауылынан басталған ауру іле-шала көрші елді-мекендердегі ірі қараны да сұлатқан. Малмен күн көріп отырған тұрғындар барынан айырылып, қымбат дәрі алып, өздері амалдап отыр. Оның өзінде бір сиырға кемі 20-30 мың теңге керек.

Ірі қараның белгісіз ауруға шалдыққанына айдан астам уақыт өткен. Жергілікті тұрғындар өз беттерінше ем-дом жасағанымен, нәтиже болмай тұрған көрінеді. Ал малдың өлексесін өртеп немесе ауыл іргесінен қазылған шұңқырларға әкеп тастап жатыр.

Жергілікті басшылар түсінік жұмыстарын жүргізіп, карантин жарияламақ түгілі қарасын да көрсетпеді дейді тұрғындар. Бірақ, әкімдіктегілер қаражат бөлініп, қажетті дәрі алынып жатыр, деп азар да безер. Тек нақты диагноз анықталмайынша, артық қимыл жасамай отыр екен.

— Қазақтың ғылыми зерттеу институтынан екі ғылым докторы келді. Малдан сынамалар алып кетті, қан алды, қорытындысы әлі шықпай тұр. Енді бұрынғы заман емес, қазір лабораториялық зерттеу қорытындысы мен шешім алынады ғой, — деп түсіндірді Құрманғазы аудандық ветеринария бөлімінің басшысы Әлімбай Әбдірахманов.

Қазір ауданда мың жарымға жуық ірі қара белгісіз ауруға шалдыққан. 40 бастан астамы арам қатқан. Әкімдіктегілер, аурудың таралуына жұрттың өзін кінәлады. Өйткені, жем-шөпті үнемдегендер ауру малды өріске өзгелермен бірге жіберіп, жағдайды одан әрі ушықтырып отыр екен.

Загрузка...