Атырау облысының әкімі өз көмекшілерін қатаң сынға алып, дәрменсіз деп атады. Құрылысы тоқтап қалған ғимараттарды аралап шыққан өңір басшысы шенеуніктерге осындай баға берді. Облыс әкімінің орынбасары Тимур Шәкімов, Атырау қаласының әкімі Серік Шәпкенов және құрылысқа жауапты тұлғалар мен мердігерлер, жобалаушылар да өңір басшысымен бірге жүрді.
Бұл туралы Қазақпарат хабарлады.
«Енді қате жобалаудан «Нұрлы жол» бағдарламасы бойынша қаржы өз уақытында игерілмейді. Неге бұлай болды, бұл мәселені кім қадағалады? Жоба жай ғана сурет емес, жоба болуы тиіс. Жұмыстың тоқтап қалуына неге мердігер жауап беруі тиіс, күтпеген шығынды неге олар төлеуі тиіс?» – деді әкім.
Әңгіме барысында, облыстық құрылыс бөлімінің басшысы Тілек Махуовтың нысанға бір рет те келмегені, құрылыс барысымен мүлдем таныспағаны белгілі болды. Махуовтың айтуынша, оған құрылыс алаңына баруға рұқсат жоқ. Бөлім басшысының жауабы өңір басшысының ызасын тудырды.
Ноғаев Нұрсая шағынауданындағы мектептің, монша-сауықтыру кешенінің және 1200 адамға арналған концерт залының құрылыс орнына барды. Олар да құрылысы аяқталмаған нысандар тізіміне енген. Сапар қорытындысы бойынша, Нұрлан Ноғаев өзінің орынбасары Тимур Шәкімовке әр нысанды жеке қадағалау туралы тапсырма берді.