Қасым-Жомарт Тоқаев барша қазақстандықтарды Қазақстанның БҰҰ Қауіпсіздік кеңесіне мүше болуымен құттықтады

49 просмотров

Бүгін Парламент Сенатының Төрағасы Қасым-Жомарт Тоқаев ҚР Президенті мен барша қазақстандықтарды Қазақстанның БҰҰ Қауіпсіздік кеңесінің тұрақты емес мүшелігіне сайлануымен құттықтады.

Бұл туралы ҚазАқпарат хабарлайды.

Сенаттың жалпы отырысын ашқан спикер ең алдымен кеше Қазақстан алғаш рет БҰҰ Қауіпсіздік Кеңесінің 2017-2018 жылдарға тұрақты емес мүшесі болып сайланғанын, Бас Ассамблеяда өткен дауыс беру кезінде Қазақстан 138 мемлекеттің қолдауына ие болғанын атап өтті.

«Бұл — шын мәнінде тарихи оқиға», — деген Сенат төрағасы, ең алдымен, барлық палата депутаттары атынан Елбасы Нұрсұлтан Назарбаевты және барша қазақстандықтарды тарихи оқиғамен құттықтады.

— Бұл — Елбасы бастаған отандық дипломатияның тарихи жеңісі, бүкіл әлем таныған сыртқы саясаты сындарлы ел екеніміздің айқын көрінісі болып табылады. Осы оқиға орын алуы үшін бір топ қазақстандық дипломаттар, қоғам қайраткерлері өздерінің қомақты үлесін қосты. Солардың ішінде әріптесіміз Бірғаным Әйтімова да бар. Сенаторлар атынан Сізге алғыс білдіргім келеді, — деді Қасым-Жомарт Тоқаев.

Сенатор дүрбелеңге толы аса күрделі ғаламдық ахуал жағдайында Қазақстанның осындай беделді әрі жауапты миссияны абыроймен атқаратынына кәміл сенетіндігін айтты.

Загрузка...