Астанада атысқандар 7 жылға сотталуы мүмкін
Астанада атысқандардың айыбы дәлелденсе, олар 7 жылға темір тордың арғы жағына тоғытылуы мүмкін. Бұл туралы Астана қаласы ішкі істер департаменті баспасөз қызметінің жетекшісі София Қылышбекова мәлімдеді.
Кеше түнгі сағат 23:00 шамасында Астананың қақ ортасында оқ атылды. Қазіргі уақытта бұзақылық жасағандардың барлығы қолға түскен. Олар Астана қаласының тұрғындары екен.
– Қалада 14 маусым күні түнгі сағат 23:00 шамасында атыс болды. Тергеу барысында бұрыннан таныс 28 және 32 жастағы азаматтардың өзара жанжалдасып қалғаны белгілі болды. Екеуі де той ұйымдастырумен айналысады. Біреуі лимузиндерді жалға берсе, екіншісі тойда видео, фото түсірілімдер жасаумен аналысқан.
Бізге белгілі болғандай, олар жеке бас мәселесі бойынша келіспей қалған. Қақтығыс Сәтпаев-Момышұлы көшелерінің қиылысында болған. Жанжалдасушы тарап ол араға достарын ертіп барған. Қатысушылардың біреуі травматикалық тапаншадан оқ атса, тағы біреуі қорқыту үшін жаттығу гранатасын лақтырған, – деді ол.
Сондай-ақ бұзақылар 7 жылға сотталуы мүмкін.
– Бүгінде ҚР Қылмыстық кодексінің 293-бабы, яғни «Бұзақылық» фактісі бойынша іс қозғалды. Егер де олардың айыбы дәлелденетін болса, 7 жылға дейін бас бостандығынан айырылуы мүмкін. Қазіргі таңда бастапқы тергеу жұмыстары жүргізіліп жатыр, – деді Астана қаласы ІІД баспасөз қызметінің жетекшісі.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе