Қарағандыда „Әлем„ ірі сауда үйінен наурыз айында ірі көлемде ұрланған қымбат бұйымдардың бір бөлігі табылды.
Бұл туралы Қарағанды облысы ішкі істер департаментінің баспасөз қызметі хабарлады.
„Қарағандыдағы ірі сауда үйінің біріндегі зергерлік бөлімді тонау ісі бойынша жаңа мәлімет пайда болды. Ағымдағы жылдың наурыз айының соңында зергерлік бөлімдегі орын алған ұрлық ісі бойынша ұсталғандардың бірі қылмыс жасағандығы туралы мойындады. Кейінірек ішкі істер органдарының қызметкерлерімен күдікті жұмсап үлгермеген АҚШ-тың 9000 доллар көлемінде ұрланған ақша, сондай-ақ 6 келі көлемінде алтын зергерлік бұйымдар заттай дәлелдері табылды. Қазіргі уақытта күдіктінің көрсеткен жерлері тергеумен тексерілуде, оған қатысты ҚР Қылмыстық кодексінің 188 бабының 4 тармағы бойынша қылмыстық іс қозғалды„ делінеді баспасөз хабарламасында.
Еске сала кетелік, Қарағандыда 28-наурызда кешкісін „Әлем„ сауда үйінен ірі көлемде зергерлік бұйым жоғалды. Қаскөйлер сауда үйінің 10 бутигін жып-жылмағай етіп, тонап кеткен. Дабыл белгісі сөндірілген. Таңертең жұмысқа келген саудагерлер сыртқы есіктің сынып жатқанын көрген. Барлығы жақында ғана жұмысқа орналасқан күзетшіден күмәнданды.