Қарағандыда белгісіз кеселден екі адам көз жұмды. Дәрігерлер “олар Сібір жарасын жұқтырып алған болуы мүмкін” деп отыр.
“Бұған дейін облыстық жұқпалы аурулар ауруханасына мал етін жегеннен кейін денелеріне бөртпе қаптап, дене қызуы көтерілуі мүмкін деген сегіз адам жеткізілген” – дейді 31 арна. Науқастардың ішінде он жастағы бала да бар. Бірақ аймақта карантин жариялауға әлі ерте деген дәрігерлер, қалғандардың жағдайы жақсарды дейді. Ал еліміздің денсаулық сақтау министрлігі арнайы сараптамадан соң ғана нақты диагноз қойылады деп отыр.
Нақтылай кетсек, Еркіндік ауылында бір әулеттің мүшелері сойылған мал етін жегеннен кейін ауруханаға түскен. Барлығының дене қызулары көтеріліп, денелері бөрте бастаған. Және қолдарына маса шаққаннан кейін шығатын ісікке ұқсас жара қаптап кеткен.
Әзірге дәрігерлер сібір жарасы болуы мүмкін деп алдын ала қойған диагноздан көз жұмғандардың бірі отыз үш жастағы әйел. Ол жансақтау бөлімінде есін жимаған күйі қайтыс болған. Артында төрт баласы қалыпты.
Облыстық жұқпалы аурулар ауруханасының төсегінде көз жұмған екі адамның мәйіті Қарағандыдан бес шақырым жердегі Жаңаөзен ауылындағы сараптама бөліміне жіберілді. Еліміздің Қарағанды мен Шығыс Қазақстан облыстары ошағы болған аурудың диагнозы екі тәуліктен соң ғана белгілі болады.
Тамара Дүйсенова, Денсаулық сақтау және даму министрі:
– Ол енді “сибирская язва” ауруы ма, басқа ауру ма оны алдағы уақытта анықтайтын боламыз. Сондықтан қазір “сан-эпид служба” өзінің қажетті зерттеулерін жүргізіп жатыр. Содан кейін ұлттық экономика министрлігі өз мәлімдемесін жасайды,-деді.
Сібір жарасы мал және жабайы жануарлардан адамға тез тарайтын аса қауіпті жұқпалы ауру. Қауіпті індет әсіресе маусым-қыркүйек айларында өрши түседі. Сібір жарасы малға оларды ауру қоздырғышымен ластанған жайылымдарға жайып баққанда, шөп, су арқылы тарайды.
Ал жүз елу түтіні бар Еркіндік ауылында жергілікті мамандар ірі қараларды тексеруге кірісті. Бірақ, әзірге, елдімекенде карантин жарияланбапты.