Қарағандыда 41 жастағы әйел «ФинансОптоГрупп» атты қаржы пирамидасын құрып, ақшасын еселеп қайтарып алатындарына сендіріп, елден ақша жинап, тайып тұрмақ болған.
Қазір қолға түскен күдіктінің тергеу кезінде қылмыстық іздестіру мен соттан жалтармақ болғаны нақтыланды деп хабарлады Қарағанды ішкі істер департаментінің баспасөз қызметі.
Қарағанды қаласының 41 жастағы тұрғынына қатысты ҚР ҚК 217-бабы 3-бөлімі 2-тармағы, яғни „Ақша тарту немесе аса ірі көлемде басқа мүліктерді пайдалану арқылы қаржылық (инвестициялық) пирамида құру және оған басшылық ету„ бойынша қылмыстық іс тергеліп жатыр.
Сол секілді тергеу кезінде күдікті қылмыстық іздестіру мен соттан жалтармақ болғаны нақтыланды. Ол Қарағанды қаласында тұрақты меекенжайға тіркелмей пәтер жалдап тұрған, сондай-ақ, құпия түрде Ресей Федерациясында тұрақты мекенжайға тіркелген анасына өзінің кәмелетке толмаған балаларын көшіріп апарған.
Өндірістік базада тіркелмегендіктен, құрылыс бригадалары, құрал-жабдықтары болмағандықтан күдікті азамат ешқашан кәсіпкерлік жұмыспен айналыспағаны анықталды. 2016 жылдың 18-қазанында Қарағанды қаласы Октябрь аудандық сотының санкциясымен күдіктіні «қамауға алу» туралы бұлтартпау шарасы қабылданды. Қазіргі уақытта күдіктінің қылмыстық іс-әрекетінен зардап шеккендер мен оларға қаншалықты қаржылай шығын келтірілгені нақтылану үстінде.
«Қаржылық пирамиданың» іс-әрекетінен зардап шеккен тұрғындар болған жағдайда, жедел арада ішкі істер органдарына хабарласуларын сұраймыз. Қылмыстық істің тергелуі ішкі істер департаменті мен прокуратура органдарының бақылауында„ делінеді баспасөз баянында.