Қаныш Сәтпаевтың үлкен қызы Ханиса дүниеден озды

51 просмотров

Атақты ғалым, академик Қаныш Сәтпаевтың үлкен қызы, медицина ғылымдарының докторы, профессор Ханиса Сәтпаева 95 жасқа қараған шағында қайтыс болды.

Ханиса Сәтпаева — Қазақстанның қазба байлығының көзін ашушы ғұлама ғалым Қаныш Сәтпаевтың үлкен қызы. 1921 жылы Павлодар облысы Баянауыл ауданының «Теңдік» атты ауылында дүниеге келген Ханиса Қанышқызы бүкіл ғұмырын әкесі секілді ғылымға арнады.

Ханиса Сәтпаева халық денсаулығын сақтауға баға жетпес үлес қосқан медицина саласы атақты ғалымдарының есімдері енгізілген Санжар Асфандияров атындағы мемлекеттік медициналық университеттің алтын Қорының өкілі болып табылады.

Ханиса Сәтпаеваның басшылығымен Қазақстан Республикасының барлық жоғары оқу орындарына валеология сабағын енгізілді. Ол 1999, 2007, 2009 жылдары мемлекеттік және орыс тілдерінде шығарылған валеология бойынша алғашқы типтік бағдарламаның және оқу-әдістемелік құралдың авторы болып табылады.

1995 жылы Қазақстанда алғаш рет Ханиса Қанышқызы медициналық және педагогикалық жоғары оқу орындарына арнап «Адам физиологиясы» оқулығын шығарды. Осы еңбегі үшін профессор Ханиса Сәтбаева Ахмет Байтұрсынов атындағы медальмен марапатталған.

Көп жылдық ғылыми-педагогикалық және қоғамдық қызметі үшін Сәтбаева «Еңбек Қызыл Ту» орденімен, «1941-1945 жылдары Ұлы Отан соғысында көрсеткен қажырлы еңбегі үшін», Павлов атындағы және «ҚР тәуелсіздігіне 10 жыл» (2001), «Құрмет белгісі», «Қазақстанның ғылымына еңбек сіңірген қайраткері» (1981) медальдарымен, «КСРО жоғары мектебінің үздігі», «КСРО денсаулық сақтау үздігі» белгілерімен марапатталған.

Загрузка...