Шаңырақ ықшамауданында 1-сыныптан 17 сынып жасақталып, былтырғы рекорд жаңарды

46 просмотров

Алматының Алатау ауданына қарасты Шаңырақ-2 ықшамауданындағы №26 мектепте биыл бірінші сынып бойынша 17 класс комплектісі жасақталды. Былтыр мұнда 1 сыныптан 14 класс құралған еді.

Мектеп директоры Баян Елеунұрованың Азаттыққа айтуынша, бала санының көбеюіне Шаңырақ-2 ықшамауданына халықтың көптеп қоныстануы себеп.

Оның сөзінше, биылғы оқу жылында 480-ге жуық бала бірінші сыныпқа қабылданған. Әр класста 25-30 аралығында бала оқиды. Мектепте былтырғы оқу жылында бірінші сыныптан 14 болған. Биылғы бірінші сыныптардың реттік саны алфавиттің «Р» әрпіне дейін жеткен.

Директордың оқу ісі жөніндегі орынбасары Кәмила Жайылғанованың сөзінше, мектепте биылдан бастап 12 жылдық білім беру бағдарламасы бойынша оқытыла бастайды. Жайылғанова мектептегі 3 мың 200 оқушының жартысынан астамы — бастауыш сыныпта оқитынын, әзірге мектепте «кабинет жетіспеушілігі мәселесі жоғын» айтады.

Қазақстан білім және ғылым министрлігінің дерегінше, биыл Қазақстан мектептерінде 2,5 миллион бала оқиды. Ал 370 мың бала бірінші сыныпқа барады.

Биыл көктемде министрлік бірінші сынып оқушыларына бес күндік оқу аптасын енгізу туралы шешім шығарған. Ал мектептердегі барлық сыныптарды бес күндік оқуға көшіру науқаны 2019 жылы аяқталуы тиіс.

Загрузка...