Алматыдағы атысқа қатысты жалған ақпарат таратқан екі адам құрықталды, – деп хабарлады қалалық ішкі істер департаментінің баспасөз қызметі.
Криминалдық полицияның мәліметі бойынша, жалған ақпаратты таратушыларды құрықтау кешенді жедел-іздестіру шараларын жүзеге асыру барысында мүмкін болған.
«Ел ішінде үрей мен дүрбелең туғызған арандатушылар арасында жоғары оқу орнының студенті бар. Ол 1995 жылы туған Ч. деген бойжеткен. Бұл азаматша өзінің әлеуметтік желідегі парақшасында Алматыдағы оқиғалар туралы жалған ақпарат таратқан. Атап айтқанда
«Сити Плюс» сауда үйінде „адамдар кепілдікке алынды„, „қылмыскер қолынан қаза тапқан адам бар„ деп мәлімдеген.
Бұл кезде әлеуметтік желідегі екінші пікір білдіруші – 1993 жылы туған А. есімді азамат. Ол әлеуметтік желілерді пайдаланып мақсатты түрде жалған ақпарат таратқан. Ол таратқан хабарламада
„қаланың төменгі жағында 100-ге жуық қаруланған адам халыққа оқ жаудырып жатыр-мыс„ деген мәліметтер болған.
Қазір бұл екі азамат ҚР Қылмыстық кодексінің 274-бабы 2-бөлімінде қарастырылған қылмыстың нышандары бойынша ұсталып, олардан жауап алынуда.
Алдағы уақытта қолданыстағы процедура талаптарына сәйкес, оларға қатысты бұлтартпау шарасы қабылданатын болады», – деп хабарлады Алматы қаласы ішкі істер департаментінің ресми өкілі, полиция майоры Салтанат Әзірбек.
Солай десек те, белгілі адвокат Жохар Өтебеков пен Сөз еркіндігін қорғайтын „Әділ сөз„ халықаралық қорының президенті Тамара Калеева қорқыныш пен үрейге берілген адамдарды жалған ақпарат таратты деп кінәләудің орынсыз екені туралы мәлімдеген болатын.
Сондықтан
негізгі міндеті азаматтарды құқыққа қарсы әрекеттерден қорғау болып табылатын ішкі іскі органдарының бұл әрекеті қаншалықты қисынды болар екен?