Алматыда заңсыз көші-қонды ұйымдастырған 5 заңды тұлғаның қызметіне тосқауыл қойылды. Бұл туралы бүгін Алматы қаласы прокурорының орынбасары Берік Жүйріктаев мәлім етті.
«Заңды тұлғалар шет елдік азаматтарға іскерлік рұқсатнамаларды олар конференцияларға, форумдарға, көрмелерге, іскерлік келіссөздерге, консультациялық немесе аудиторлық қызметтер көрсету шараларына қатысады деген себеппен рәсімдеп беріп отырған. Алайда, көрсетілген компаниялардың шақыруымен келген шетелдіктер рұқсатнама беруге негіз болатын шараларға қатыспаған. Демек, олар Қазақстанға басқа мақсатпен келген», – деді Б. Жүйріктаев.
Осылайша, 2015 жылдың басынан күні бүгінге дейін Алматыға 900-ден астам шетелдік азамат заңсыз шақырылған.
Алматы қаласының прокуратурасы келтірілген деректер бойынша ҚР Қылмыстық Кодексінің 394-бабының 3-ші тармағы бойынша (қылмыстық топтың заңсыз көші-қонды ұйымдастыруы) қылмыстық іс қозғады.
Қазір сотқа дейінгі тергеу шаралары жүргізіліп жатыр.