Алматыда террористік қауіптің қызыл деңгейінің енгізілгеніне байланысты екінші деңгейлі банктердің кей бөлімшелері, сауда орталықтары мен кинотеатрлар жабылды.
Бұл туралы ҚазАқпарат хабарлайды.
Kaspi Bank хабарлағандай, Алматыда клиенттер мен қызметкерлердің қауіпсіздігі үшін барлық бөлімшелер жабық. Сонымен қатар, «Астана Банкінің» кей бөлімшелері уақытша жабылды, карталарды жеткізу уақытша тоқтатылды. «Қазкоммерцбанктің» Әл-Фараби көшесіндегі бас кеңсесінен басқа барлық бөлімшелері кешке дейін жабық болады. Сондай-ақ, «Халық банкі» АҚ барлық бөлімшелерінің есігіне құлып салынды.
Бүгін Алматыда белгісіз біреулер қаланың бірнеше ауданында оқ ата бастады. Полицейлер мен белгісіз адамдар арасында атыс болды. Қалалық Ішкі істер департаментінің ақпаратынша, полицейлер арасында қаза тапқандар бар. Шабуыл жасағандардың екеуі ұсталды. Қалада террористік қауіптің қызыл деңгейі жарияланды.