Еліміздің тарихында тұңғыш рет жүзуден олимпиада чемпионы атанған Дима Баландиннің ата-анасы мен оны осыған дейін жаттықтырып келген бапкерлерімен тілшілер жүздесті.
Диманың бала кезде судан өлердей қорыққанын бапкерлерінен басқа ешкім білмейді деп хабарлады КТК арнасы.
Алексей Баладин, Дмитрий Баландиннің ағасы:
– Жеңгенін таңғы жетіде естідік. Басында түсінбей қалдық. Сосын қуанғаннан көзімізден жас шықты. Інім жарады!
Ал әкесі теледидардан көз алмай әлі отыр. Олимпиаданың қайталауын қараған ол баласының бас жүлдесіне әлі сене алар емес.
Игорь Баладин, Дмиртий Баландиннің әкесі:
– Ұлым, жарады! Шынымды айтсам не дерімді білмеймін. Бастысы – арманы орындалды.
– Әлемдегі небір кіл мықтыны артта қалдырып, Қазақстанға алтын алған Дима бала кезде мына бассейнде дайындалған. Тіпті есейгенде де арасында келіп жаттығып жүріпті. Өздеріңіз қарап отырғаныңыздай, чемпион шыққан хауыз ешқандай да алтын жалатылмаған. Тіпті қарапайым. Ескіргені сонша, темірлерінің сыры әлдеқашан кетіп қалған. Бірақ бапкерлер бұл бассейн жөнделетін болды деп айтып отыр, – дейді тілші.
Андрей Хохлов, Диманың бала кездегі бапкері:
– Дима осы бассейнде жаттығып өсті. Осында келіп жүзуден алғашқы қадамдарын жасады. Техниканы меңгерді. Рас, төртінші сыныпта ол судан қатты қорқатын. Бірақ, ол қорқынышты жеңе алды. Кейіннен судан мүлде сескенбейтін болып, жарыстарға шыға бастады.