Алматыда ашаршылық ескерткіші орнатылатын болды

38 просмотров

Бүгін Алматы қаласының әкімі Бауыржан Байбектің қатысуымен Аштық пен қуғын-сүргін құрбандарын еске алу жиыны өтті. Жиында әкім Наурызбай батыр мен Қабанбай батыр көшелерінің қиылысындағы саябақтағы қара тастың орнына ескерткіш орнатылатынын мәлімдеді деп хабарлайды abai.kz.

— Кеңестік жүйенің қудалауына ұшырап, азаттық жолында нақақтан нақақ құрбан болған қайраткерлердің рухына бағыштап, тас белгінің орнына ескерткіш орнатылады. Бұл ескерткіш Тәуелсіздіктің 25 жылдығының аясында іске асырылмақ, — деді Алматы қаласының әкімі Бауыржан Байбек.

Қоғам қайраткері Мұхтар Тайжан ашаршылық пен саяси қуғын-сүргін құрбандарын еске алу үшін бүгін бұл саябақтың таңдалып алынғандығы кездейсоқтық емес екенін айтады.

— Жақын маңда НКВД-нің жер төлелері болған, олар әлі де бар. Онда көп ұлт зиялысы азапталып, қорланды. Сондықтан ескерткіш орнатылса, оның осы арадан бой көтеруі орынды. Жалпы, осы арадан ескерткіш орнату мәселесінің көтеріліп келе жатқанына 23-24 жыл болды. Ақыры мақсатқа жеттік. Шүкір. Ендігі мәселе – қаладағы Мирзоян көшесінің атауын өзгерту болуы тиіс. Бұл да кезек күттірмес мәселе, — деді қоғам қайраткері Мұхтар Тайжан.

Алматы сыртындағы Боралдай ауылында „Қанды сай„ деген жер бар. Ол арада саяси қуғын-сүргін құрбандарына арналып мемориал орнатылған. Тура сол араға „қанды кезеңде„ Наурызбай батыр мен Қабанбай батыр көшелері қиылысқан тұстағы жер төлелерде НКВД бас шабарлары өлтірген азаматтарды әкеліп көмген. Адам денесі бар қаптарды қала тұрғындарын шошытып алмас үшін таңға жуық  жасырын тасымалдаған.

Қазақ халқы үшін қасіретті кезеңді еске алған Алматыдағы жиынға келгендердің қатарында аға буын өкілдерінен ақын, жазушы  Мұхтар Шаханов, белгілі жазушы Смағұл Елубаймен қатар, Мұхтар Тайжан, Айдос Сарым және тағы басқа қоғам өкілдері болғанын баса айта кетелік.

Загрузка...