Алматыда жол-патрульдік полициясының қызметкерлері мен полицияның учаскелік инспекторларынан құрылған түнгі іздестіру тобы адам тонауды кәсіп еткен күдіктілерді «ізін суытпай» қолға түсірді.
Бұл туралы Алматы қалалық ішкі істер департаментінің баспасөз қызметі хабарлады.
– Кісі тоналып, оның ізі суымай, сол арада екі күдікті ұсталды. Тағы бір күдікті қашып, тұрғын үйлердің бірінің подъезіне тығылған. Кейінірек белгілі болғандай, бұл үйде жас жігіттер уақытша пәтер жалдап тұрған. Баспанаға жүгіріп кірген ол ізіне түскен полиция қызметкерлеріне қарсы травматикалық ықпалдағы тапанша қолдануға тырысқан. Алайда тәртіп сақшылары оны дер кезінде залалсыздандырып, қолға түсірді.
Қарудың еш жерде тіркелмегені анықталды. Қазіргі таңда ҚР Қылмыстық кодексінің 191-бабының 2-бөлігінде қарастырылған қылмыс белгілері бойынша (тонау) сотқа дейінгі тергеу басталды. Ұсталғандар ҚР Қылмыстық-процессуалдық кодекстің 128-бабына сәйкес уақытша ұстау изоляторына қамауға алынды. Әрі қарай олар тергеу кезеңінде бұлтартпау шарасын таңдау үшін сотқа жіберілетін болады»,- деді Әуезов аудандық ішкі істер басқармасының бастығы, полиция полковнигі Бақыт Қасабеков.
Сондай-ақ аудандық ішкі істер басқармасындағылардың айтуынша, қазіргі уақытта полицияның жедел бөлімшелері ұсталғандардың осы іспеттес басқа да қылмыстарға қатыстылығын тексеруде. Күдіктілердің үшеуі де Оңтүстік Қазақстан облысының тұрғындары болып шықты. Олардың барлығы – 20-жастағылар.