Алматы әуежайын дүрліктірген азамат екі айға қамауға алынды

20 просмотров

Түрксіб аудандық соты Алматы әуежайында сынап төккен ер адамды екі айға қамауға санкция берді.

Бұл туралы Алматы қалалық сотының баспасөз қызметі хабарлады.

Қызылорда тұрғыны 2016 жылдың 3 желтоқсанына дейін, яғни екі айға қамалды.

„Осы іс бойынша сотқа дейінгі тергеу шаралары ҚР Қылмыстық кодексінің 286-бабының 1-бөлігі, яғни «Айналыстан алып қойылған заттардың немесе айналысы шектелген заттардың контрабандасы» бойынша жүргізіліп жатыр. Осы бап бойынша заң бұзушы мүлкi тәркiленiп немесе онсыз, 5000 айлық есептiк көрсеткiшке  (10 миллион 650 мың теңге) дейiнгi мөлшерде айыппұл салуға не сол мөлшерде түзеу жұмыстарына не 5 жылға дейiнгi мерзiмге бас бостандығын шектеуге не сол мерзiмге бас бостандығынан айыруға жазаланады„ делінеді баспасөз хабарламасында.

Еске салайық, биыл 3-қазанда Алматы әуежайында Алматы — Тбилиси бағыты ұшағына мінбек жолаушыларды тексеру кезінде бір ер азамат шыны ыдыстағы сынапты қоқыс жәшігіне лақтырып, сындырған. Салдарынан төгілген улы зат айналдағыларға қауіп төндіріп, әуежайдағыларды эвакуациялауға тура келген, сол секілді 6 рейс мерзімінен кеш ұшты.

Кейіннен сынапты төккен жолаушы Қызылорданың 28 жастағы тұрғыны екені белгілі болды.

Загрузка...