Алматы облысында табылған үш кісінің өліміне қатысты жаңа деректер белгілі болды. Мал саудасымен айналысатын Жарқынбек Долданұлы, Мұқият Зарлыханұлы және Қадылбек Әлімхан есімді азаматтарды белгісіз біреулер Ұзынағаш ауылынан 200 шақырым жерге апарып, көміп кеткен, – деп хабарлайды BAQ.kz тілшісі.
Марқұмдардың әрқайсысының артында екіден, үштен жас балалары, қарт ата-аналары қалған. Бұған дейін аталған оқиғаға қатысы бар деген күдікпен екі адамның ұсталғаны туралы Алматы облыстық ІІД өкілдері хабарлаған еді.
Еске салайық, Талдықорған қаласына жақын маңдағы Көксу ауданының 3 тұрғыны Алматы жақтағы Ұзынағаш базарында мал сатамыз деп із-түссіз жоғалып кеткен болатын. Ал кеше олардың екінші жүк көлігі табылған болатын. Жамбыл ауданына қарасты Дегерес ауылының маңынан екінші жүк көлігі табылды.