Қызылордада терроризм актісі жайлы жалған хабар берген азамат анықталып, ұсталды.
Бұл туралы Қызылорда облыстық ішкі істер департаментінің баспасөз қызметі хабарлады.
Кеше, 27-қазанда сағат 21.32 шамасында белгісіз азамат қоңырау шалып, Алматы қаласындағы метрода демалыс күндері террористік акті жасалатындығы жайлы көрінеу жалған хабар берген.
Қызылорда облыстық ішкі істер департаментінің Экстремизмге қарсы күрес басқармасы мен ҚР Ұлттық қауіпсіздік комитетінің бірлесіп жүргізген жедел-іздестіру жұмыстарының нәтижесінде Қызылорда қаласының 1966 жылы туылған тұрғыны анықталып, ұсталды.
Егер де азаматтың кінәсі дәлелденген жағдайда, дайындалып жатқан терроризм актісі туралы көрінеу жалған хабарламасы үшін 6 жылға дейінгі мерзімге бас бостандығынан айыруға жазаланады.