Алакөл демалыс орнына ұшақпен қатынайтын күн жақын

73 просмотров

ҚР Инвестициялар және даму министрлігі Алматы облысындағы Алакөл демалыс аймағына қарай жаңа маршруттар ашуды қолға алмақ.

Бұл туралы бүгін баспасөз мәслихатында ҚР Инвестициялар және даму министрлігінің ресми өкілі Қайсар Жұмабайұлы мәлім етті деп хабарлайды ҚазАқпарат.

Ресми өкілдің айтуынша, Алакөл демалыс аймағында қазіргі күні жаңа қонақ үйлер, демалыс орындары секілді нысандарды салу қолға алынған.

— Сонымен қатар, туристер үшін жайлы әрі қауіпсіздікті қамтамасыз ету мақсатында Үшарал қаласының әуе-жайы арқылы ұшу жиілігін қалпына келтіру қажеттілігі туындап отыр.

Бұл ретте ҚР Инвестициялар және даму министрлігі мен Қорғаныс министрлігінің Үшарал қаласының әскери аэродромын бірлесе пайдалану туралы бұйрығы да қабылданған. Яғни, аталмыш әскери аэродром азаматтық авиация үшін де қолданылады, — деді Қайсар Жұмабайұлы.

Оның айтуына қарағанда, қазіргі күні Үшарал қаласында әуежай құрылысына қатысты жобалық-сметалық құжаттар дайындау аяқталған.

Загрузка...