Ақтөбедегі қанды оқиғаға қатысқан азаматтардың бірі ұсталды. Бұл туралы еліміздің ҚР Ішкі істер министрлігінің ресми өкілі Алмас Садубаев хабарлады. Тәртіп сақшылары қылмыскерді бүгін сағат 06:00-де қолға түсірді, – деп хабарлайды 24kz.
– Құқық қорғау және арнайы қызмет органдары қылмыскерлерді іздеу және оларды ұстау үшін, Ақтөбе қаласы территориясындағы қауіпсіздікті қамтамасыз етуде кешенді шараларды жүзеге асырып жатыр. Бүгін, шамамен, таңғы 6-да Ақтөбе облысы, Қобда ауданының Қобда ауылында шабуылға қатысқан бір қылмыскер ұсталды. Қалған алтауды іздеу әлі жалғастырылып жатыр, – деді Алмас Садубаев.
Ақтөбе қаласындағы антитеррорлық операцияға қатысы бар күдіктілер әлі іздестіріліп жатыр. Облыстық ішкі істер департаментінің баспасөз қызметінің жетекшісі Ардагер Уайдиннің айтуынша, олардың мекен-жайын хабарлаған адамға 5 миллион теңге тағайындалды.
Естеріңізге салсақ, 5-маусым күні Ақтөбеде белгісіз біреулер екі қару-жарақ дүкенін тонап, әскери бөлімшеге шабуыл жасаған болатын. Полицейлер мен қылмыскерлер арасындағы қарулы қақтығыс кезінде 13 қылмыскердің көзі жойылып, бесеуі ұсталды. Сонымен қатар, 7 адам мерт болды. Олардың үшеуі бейбiт тұрғын.