Ақтөбе қаласында орын алған сұйытылған газ отынының тапшылығына байланысты облыстық энергетика және тұрғын үй-коммунальдық шаруашылығының басқармасы түсініктеме берді.
Бұл туралы aktobenews.kz хабарлайды.
— Халықтың қобалжуына еш негіз жоқ. Автокөліктерге арналған газ отынының тапшылығы оны тасымалдаудағы кешігулер мен кейбір газ отынын сатушы компаниялардағы техникалық ақаулардың салдарынан орын алды.
Мысалы, «Бағыс» ЖШС-де жаңағы айтқандай техникалық ақаулар болған. Дегенмен жағдай толық бақылауға алынды, — деді облыстық энергетика және тұрғын үй-коммунальдық шаруашылығы басқармасының бөлім басшысы Ербол Нұрқасымұлы.
Соңғы күндері қаладағы кейбір газ құю бекеттерінде сұйытылған мұнай газы тек талон арқылы сатыла бастады.
Құзырлы мекеменің бөлім басшысы осыған қатысты қалада мониторинг жүргізгендерін және кейбір газ құю бекеттерінде сұйытылған газдың еш талон талап етпей, еркін түрде сатылып жатқанын анықтағандарын айтады.
– «Ақжар-2 ауданындағы «ҚазақГаз» бекетінде газ отынын кез-келген адам ешқандай талонсыз сатып ала алады, — дейді ол.
Ақтөбе өңірінде сұйытылған мұнай газын екі кәсіпорын өндіреді. Олар: «Қазақойл Ақтөбе» ЖШС мен «СНПС-Ақтөбемұнайгаз» АҚ-ның Жаңажол газ өңдеу зауыты. Облыс аумағында барлығы 60 газ құю бекеті жұмыс жасаса, оның 33-і қалада, қалған 27-і аудандарда орналасқан.