Тәуелсіздіктің 25 жылдығы қарсаңында шалғай жердегі 6 мыңнан астам тұрғынға «ҚазТрансГаз Аймақ» АҚ сый жасады.
Инвестициялық бағдарлама аясында 115 шақырым қашықтыққа газ құбырын тарту, бірнеше газ реттеу бекетін салу жұмыстарына 2,6 миллиард теңге жұмсалды, деп хабарлайды „ҚазТрансГаз Аймақ„ АҚ-тың баспасөз қызметі.
«ҚазТрансГаз» АҚ автоматтандырылған газ тарату станциясы, блокты газ реттеу бекеті мен шкафты газ реттеу бекетін салып, 92 шақырым жеткізуші газ құбырының құрылысын тоқтаусыз жүргізді.
«Облыстың елді мекендерін газдандыру үшін кешенді жұмыс жүргізіліп жатыр. Соның бір саласы – Ойыл ауданы. Аудан орталығына келген газ халықтың әлеуметтік жағдайын жақсартып, бизнестің дамуына ықпал етеді деп сенеміз. Бұл – «ҚазТрансГаз Аймақ» АҚ-тың ел егемендігінің 25 жылдығына арнаған тартуы. Газ – экологиялық таза, үнемді. Көмірден 4-5 есе арзан. Енді пайдалану жолын білу керек. Дабыл жүйесін қондыру маңызды»,- дейді компанияның облыстық филиал директоры Аманжол Тәжіғалиев.
Айта кетейік, қараша айында Ырғыз ауданына газ барады. Ақтөбе облысының барлық аудан орталығы жыл соңына дейін газбен қамтамасыз етілмек.