Ақтөбе облысы сұйытылған газ тапшылығына байланысты квотаны көбейтуді сұрады

48 просмотров

Ақтөбедегі жанармай бекеттерінде сұйытылған газ тапшылығы сезілуде. Газ бағасы төмен болғандықтан, көптеген автокөлік иелері арзан отынға көшкен. Арнайы брифинг барысында облыстық энергетика және тұрғын үй бөлімінің жетекшісі міндетін атқарушы Амантай Бекниязов осылай мәлім етті.

— Сұйытылған газ үшін өңірлерге берілетін ай сайынғы квота 4-4,2 мың тоннаны құрайды. Біздің есебіміз бойынша, өңірімізде 206,9 мың автокөлік бар. Оның ішінде 24 мың көлік газды қолданады. Бензин бағасынан 4 есе арзан болғандықтан, көпшілігі газ отынына көшіп жатыр. Сондай-ақ, облыс әкімдігінің көлік құралдары — 850 көлік газды пайдалануды бастады,- деді Амантай Бекниязов.

Оның айтуынша, шындығында, Ақтөбе өңірі ай сайын 4200 тонна орнына 5 400 тонна газ пайдаланады. Осыған байланысты өңірлік атқару тобы энергетика министрлігінен газға квотаны көбейтуді сұрайтын болады.

«CNPC-Ақтөбемұнайгаз» АҚ және «Қазақойл» ЖШС өндірген газ тағы 4 облысқа қажеттіліктерін өтеу үшін жіберіледі, деп атап өтті Амантай Бекниязов.

Загрузка...