Ақмола облысында лаңкестікке қатысы бар 4 күдікті іздестіріліп жатыр

34 просмотров

Құзырлы орган іздеудегі оларды облыс аумағында қылмыстық әрекет жасады және басқа адамдарды өздерінің ісіне араластыруға тырысқан деп мәлім етті.

Бұл туралы Ақмола облыстық прокуратурасы үшінші басқармасының аға прокуроры Талғат Ысқақов хабарлады.

Алғашқы жарты жылдықтың өзінде қылмыстық істерді қарайтын органдар терроризм және экстремизм дерегі бойынша, сотқа дейінгі бірнеше тексеру жұмыстарын бастаған. Ысқақов қазір ол деректер бойынша, тергеу жүріп жатқанын мәлімдеді.

— Терроризм Ақмола облысында айналып өтпеді. Аймақ аумағында террористік қылмыс жасады деген күдікпен 4 адам іздестіріліп жатыр. Терроримзнің біздің қоғам үшін бас ауруға айналып бара жатқанын ескере отырып, оларға лайықты түрде қарсы тұрып, жолын бөгеп, алдын алуға тиістіміз. Терроризммен күресу үшін әр азамат құқық қорғау органдарына көмек көрсетіп, күдіктілер туралы хабарласа құба-құп, – дейді прокурор.

Соңғы екі айда Қазақстанда екі теракт болды. 5-маусымда қарулы топ Ақтөбеде бірнеше қару-жарақ дүкені мен әскери бөлімге шабуыл жасап, салдарынан әскерилер мен полицейлер қаза тапқан. Содан кейін қалада террористік қауіптік “қызыл” деңгейі жарияланған. Ақтөбедегі терактіден 8 адам қаза тауып, 38 адам жараланды.

Ал 18 шілде күні Алматының Алмалы аудандық полиция басқармасына шабуыл жасалды. Нәтижесінде 6 адам қаза тауып (үш полицей, бір шекара қызметкері және бір бейбіт тұрғын), 8 адам зардап шекті. Билік аталған оқиғаға теракт деп баға берді. Ал ұсталған күдікті бұрын сотталған 26 жастағы Қызылорда облысының тумасы болып шықты.

Загрузка...