Бүгін Ақмола облысының орталығы Көкшетау қаласында өтiп жатқан Жер реформасы жөнiндегi республикалық комиссияның көшпелi отырысында Ақмола облысының әкiмi Сергей Кулагин өңірдегі 300 мың гектар жер қытайларға жалға беріледі деген ақпараттың жалған екенін мәлімдеді.
Отырыс барысында Жер реформасы жөнiндегi республикалық комиссияның мүшесi Жанұзақ Әкiм Ақмола облысының басшысы Сергей Кулагинге сауал қойды.
«Сергей Витальевич, әлеуметтiк желiлерде Алматы облысының әкімі Амандық Баталов екеуіңіздің қытайлық компанияларға жалға жер береді екен деген ақпарат жиі айтылып жүр. Осыған түсініктеме беруіңізді өтінемін. Қытайлық компанияларға 200-300 мың гектар шамасында жалға берiледi деген сөз қаншалықты рас?», – деген сауал жолдады.
«Әрине, әлеуметтiк желiлерде соңғы уақытта өсек-аяң көп айтылып кетті. Қытайлық инвесторлармен кездескеніміз рас. Бірақ жалға жер беру туралы мәселе қаралған емес. Біріншіден, қаладағы жылу электр орталығының құрылысына инвестиция тарту қажет болды. Бұл жобаның құны – 726 млрд. теңгені құрайды. Өйткені, Көкшетауда ыстық су, жылу жоқ. Екiншiден, өңдеу саласына инвестиция тарту мәселесi.Үшiншiден, қытайларға бидайымызды сатып алуды ұсындық.
Ал 300 мың гектар жердi жалға беру туралы әңгiме мүлдем қозғалған жоқ. Бұл жалған ақпарат»,
– деді С.Кулагин.
Әкім Жанұзақ аймақ басшысынан мұндай мәселелерге дер кезінде баспасөз қызметі арқылы жауап беруді өтінді.