30 жылдай қанаттаса жұмыс істеген досымнан айрылғаныма қайғырамын — Нұрсұлтан Назарбаев

336 просмотров

Мемлекет басшысы Нұрсұлтан Назарбаев Өзбекстан Республикасының Президенті Ислам Кәрімовтің қайтыс болуына байланысты Өзбекстан Республикасы Олий Мәжілісі Сенатының төрағасы Нигматилла Юлдашевке көңіл айту жеделхатын жолдады.

Мемлекет басшысы Өзбекстан Республикасының Президенті Ислам Абдуғаниұлы Кәрімовтің дүниеден өткені туралы хабарды зор күйзеліспен қабылдағанын айтты деп хабарлады Ақорданың баспасөз қызметі.

«Қазақстандықтар бұл мезгілсіз әрі орны толмас қазаның ауыртпалығын бауырлас Өзбекстан халқымен бірге бөліседі. 30 жылдай қанаттаса жұмыс істеген досымнан айрылғаныма қайғырамын», – делінген көңіл айту жеделхатында.

Сондай-ақ, Нұрсұлтан Назарбаев елдің экономикалық әлеуетінің дамуына, оның халықаралық беделінің өсуіне, қоғамның әл-ауқатының артуына ықпал еткен ауқымды өзгерістердің жүзеге асырылуы Өзбекстан Республикасы тәуелсіздігінің бастауында тұрған Ислам Кәрімовтің есімімен байланысты екенін атап өтті.

«Ол өзінің бүкіл өмірін туған халқына қалтқысыз қызмет етуге арнады, әрдайым Қазақстанның сенімді досы болды және біздің халықтарымыздың арасында достық пен тату көршіліктің нығая түсуіне үлкен үлес қосты», – делінген жеделхатта.

Хат соңында Қазақстан Президенті Ислам Абдуғаниұлы Кәрімовтің туыстары мен жақындарына және елдің басшылығы мен бауырлас Өзбекстан халқына қатты қайғырып көңіл айтты.

Загрузка...